Manuol Sardina - carta de 31-03-1885

[Carta para José Leite de Vasconcelos, einédita até agora. Mantubo-se la scrita tal i qual cumo stá ne l manuscrito de Sardina]



Miu stimable amigo:

Scuôlho de perferencia ua ortografía aportuêsada, declarando eiquí, que la letra v sona siêmpre cumo êl b, tal y qual cumo na lhengua castilhana.
Êl mirandés, amigo, tem los adverbios tanto, quanto y tam, yê verdade; reparae biêm num tem êlquam, donde se vei, que este antressante «dialecto» nim deve senó desprezio a los que amque lo sabem cumo you, se guardam biêm de lo falar, falando-lo solo êl pobo einorante, alhá |eilhes uns cum outros, pus quando tenem que falar a outra gente que num ie mirandesa y que fala grave, isto iê, êl portués, antonces fala tamiêm am portuès. D’onde se véi, que êl Dialecto mirandés yê ua lhengua cumo que de contrabando; lhengua que naide quiêre falar delantre de los outros que nun la sabem falar, cumo se êl falar am mirandes fuôra ua accion mala. porquei todo esto? Porque los por- tuèses, que num falam este dialecto, quando lo ouvem falar, faiem siêmpre la zomba a los pobres mirandeses, gente buôna y de vergonha, cumo hai pouca. Ajuntae a esto, que los nuôssos literatos anté vós y más dous ou trés professores del curso Superior de Letras, nim al menos chegórun a saber, que tal Dialecto eisistiê. correlativo homes de la sabedoria naturales d’estes sitios,
De todo esto ha resultado «fatalmente» stacionamento, que vós, êl melhor amigo de los mirandeses, tanto lhastimaes.
Mirae: asinalei ‘l’adverbio fatalmente, para que véiades, que inda náide le dou fuôro de cidade na lhengua mirandesa y notai tamiêm que num tem ‘l adjectivo gentil, cumum a todas ou a quaije todas las lhenguas neo lhatinas, nim êl verbo partir synonimo de marchar ou salir d’um punto para outro nim outras muitas palavras deviê tener!.
Tam despreziado cumo esta esta anfeliç lhengua, solo las tradicionales capas d’honras, gorras y calçones de los mirandeses. Honra | puis a los spanholes, que siêmpre ham tenido la maior venera- cion por los varios «questumes» de suôs porvincias y comarcas!
Êl pensar nesto, bun amigo, fai-me mal, muito mal; por esso vos digo adius, anté... nim you sei quando.
San Martino d’Angueira, 31 de marcio de 1885.
Manuôl Sardina.

Alma adorada mie

Ua traduçon einédita de l Abade Manuol Sardina

Publica-se eiqui [yá salida ne l Jornal Nordeste de 19 de Agosto de 2008] la traduçon de l soneto de Luís de Camões Alma minha Gentil feita pul Abade Manuol Sardina. La traduçon fui ambiada a José Leite de Vasconcelos an carta de 31 de márcio de 1885, que nunca chegou a publicar nin deilha sequiera mos deixou nota. L abade Manuol Sardina (era assi assinaba quando screbie an mirandés) era natural de San Martino i fui, possiblemente, l purmeiro mirandés que screbiu la lhéngua mirandesa.

Alma adorada mie, que secumbiste
Tan cedo, d’esta bida descuntente,
Descansa alhá no cielo aternamente
I biba you na tierra siempre triste.

Se na glória aternal, donde chubiste,
D’esta bida hai lhembrança realmente,
Nun squeças esse amor fuorte, eicelente,
Que yá nos uolhos mius tan puro biste.

I se bés que puode algo merecer-te
L lhuito i l delor que me quedou
De la mauga forçosa de perder-te:

Roga a Dius, que tous anhos ancurtiou,
Que tan cedo d’acá me lhiebe a ber-te,
Cumo de los mius uolhos te lhevou.

Luís de Camões
Traduçon de l Abade Manuol Sardina, 1885.

Manuol Sardina. Bida i obra

Manuol Sardina, cumo gustaba d’assinar l sou nome, naciu an San Martino d’Angueira, parróquia de que fui abade, habendo sido tamien cura d’Infainç. Era un home de grande cultura i poeta de refinada senseblidade, habendo screbido an mirandés i an pertués. Inda s’aguarda la sue biografie, que bien merecie ua ambestigaçon que mos disse a coincer melhor este eilustre mirandés de l seclo XIX.
Tenerá sido l purmeiro mirandés a screbir na sue lhéngua, que coincie bien i cun quien stubo siempre an cuntato, pus pouco saliu de la Tierra de Miranda. Troca amportante correspundéncia i testos lhiterairos cun J. Leite de Vasconcellos, que l trata por “presado amigo e distincto escritor transmontano”, dedicando-le l sou poema “Lhéngua mirandesa” (Flores Mirandezas, p. 28 e p. 11). I diç que sentie “grande satisfação por ver como dois honrados e illustres Mirandeses, os meus amigos Srs. Pe. Manoel Sardinha, e Bernardo Fernandes Monteiro, tentam dar foros litterarios ao mirandês” (Estudos de Philologia Mirandesa, I, p. 31).

La personalidade i l pensamiento de Manuol Sardina queda bien claro neste cachico dua carta que le screbiu a J. Leite de Vasconcellos:
“... You mesmo, que sei bien este dialeto, solo agora, grácias al buosso bun eisemplo, i tamien al bun gusto que m’apeguestes, ampeço a descubrir filones d’ouro nesta antressantíssima lhéngua, que se ten cunserbado stacionária, cumo las gentes senzielhas que la fálan, Dius sabe quantos seclos haberá yá. I todo esto debemos nusoutros, los anfelizes mirandeses, a los gobernos paternales de l rei nuosso sinhor, que siempre nos há despreziado, i a los sábios nun menos paternales de las nuossas academias, que nin sequiera sáben de la eisisténcia de tal mina, esto ye, de tal lhéngua. Bergonha aterna a todos eilhes!...” (In J. Leite de Vasconcellos, Flores Mirandesas, 1884).
Manuol Sardina amostra, cun esta pequeinha carta, que ten ua atitude moderna subre las lhénguas i la sue amportança nun solo anquanto lhénguas mas cumo spresson dua eidentidade.

De Manuol Sardina fúrun publicadas, an mirandés, dues traduçones de grande culidade: ua de l poema de Luís de Camões “A ua cautiba por nome bárbola, ou bárbara, cum quiem êl poeta andaba d’amores na India” (in Xavier da Cunha, Pretidão de Amor. Endechas de Camões a Bárbara escrava seguidas da respectiva traducção em várias línguas e antecedidas de um preambulo, Imprensa Nacional, 1893, pp. 307-310); outra de l poema Zara (in Anthero de Quental, Zara, edição polyglotta, org. de Joaquim Araujo, Lisboa, Imprensa Nacional, 1894, p. 48). Ambas a dues son coleçones de traduçones adonde colabóran afamados outores nacionales i strangeiros, i esso tamien diç bien de l balor que le dában a Manuol Sardina. Estas dues pequeinhas traduçones ténen ua grande amportança, debendo falar-se dun doble balor: l balor que le ben de la culidade de la traduçon, que ye mui grande; l balor simbólico, pus amostra que ye possible traduzir qualquiera obra an mirandés, respeitando l balor poético dessa obra, bien al alrobés de l que pensában alguns.
Assi, Manuol Sardina fui l purmeiro a antender an perfundidade la capacidade de la lhéngua mirandesa i a ousá-la sin cumplexos de qualquiera órdene. Anque pouco conhéçamos de l que screbiu, esso bonda para dezir que fui cun el, i cun mais naide, que l mirandés alcançou l sou punto mais alto ne seclo XIX i la sue atitute delantre la lhéngua fui seguramente la mais sana de todos quantos falórun subre eilha.

Amadeu Ferreira [2004]

Manuol Sardina - scritos publicados

1. Carta screbida a José Leite de Vasconcellos na 1884 (parte)

“... You mesmo, que sei bien este dialeto, solo agora, grácias al buosso bun eisemplo, i tamien al bun gusto que m’apeguestes, ampeço a descubrir filones d’ouro nesta antressantíssima lhéngua, que se ten cunserbado stacionária, cumo las gentes senzielhas que la fálan, Dius sabe quantos seclos haberá yá. I todo esto debemos nusoutros, los anfelizes mirandeses, a los gobernos paternales de l rei nuosso sinhor, que siempre nos há despreziado, i a los sábios nun menos paternales de las nuossas academias, que nin sequiera sáben de la eisisténcia de tal mina, esto ye, de tal lhéngua. Bergonha aterna a todos eilhes!...”

Manoel Sardinha
Outubre (?) de 1884
In J. Leite de Vasconcellos, Flores Mirandesas, 1884



2. Aqueilha Cautiba, traduçon de Luís de Camões [1893]

Aqueilha cautiba
Que me ten cautibo,
Porque neilha bibo,
Yá nun quier que biba.

You nunca bi rosa
An ramos macius
Q’a los uolhos mius
Fusse tan fermosa.

Nin no campo flores,
Nin no cielo streilhas
Beio you pareilhas
Cun los mius amores.

Rostro singular!
Uolhos sossegados,
Negros i cansados,
Mas nó de matar!

Ua grácia biba
Que neilhes le mora,
Para ser senhora
De quien ye cautiba!

Pelo negro, oundeoso,
Cumparado al qual
L louro, afinal,
Ye menos fermoso!

Negrura d’amor....
Tan doce onde hai clara?
La niebe trocara
Cun eilha la quelor !

Alegre i mansa, oh!
Mas grabe, ua hourí,
Bés-la stranha si,
Mas… bárbara nó!

Sue preséncia mansa
Tromentos serena:
Toda la mie pena
Neilha anfin descansa.

Esta la cautiba
Que me ten cautibo:
I puis neilha bibo,
Ye fuorça que biba.

Luís de Camões
Traduçon de Manuol Sardina

in XAVIER DA CUNHA, Pretidão de Amor. Endechas de Camões a Bárbara escrava seguidas da respectiva traducção em várias línguas e antecedidas de um preambulo, Lisboa, Imprensa Nacional, 1893, pp. 307-310.

3. Zara, traduçon de l poema de Antero de Quental [1894]


Feliç de quien passou p’r antre la mauga
I l lhuitar de la bida temultosa
Ancunciente, cumo l’alba rosa,
I lebe qual selombra subre l’auga!

La bida era-te um suonho: andefenido,
Mas suable i traspariente, d’einocente.
Acordeste ... sorriste ... i bagamente
Acuntineste l suonho anterrumpido.

Antero de Quental
Traduçon de Manuol Sardina
in Antero de Quental, Zara, edição polyglotta, Lisboa, Imprensa Nacional, 1894.




[L testo an pertués:
Feliz de quem passou, por entre a magoa
E as paixões da existencia tumultuosa,
Inconsciente como passa a rosa,
E leve como a sombra sobre a agua.

Era-te a vida um sonho: indefenido
E tenue, mas suave e transparente.
Acordaste ... sorriste ... e vagamente
Continuaste o sonho interrompido.]



[Todos ls testos fúrun puostos cunsante la Cumbençon Ourtográfica de la Lhéngua Mirandesa, por Amadeu Ferreira.]