- Un dies saberás...
A cada die, la curjidade de Marie iba crecendo. I nin por séren moços, andaba yá an dous anhos, Juan le daba amboras daquel búltio que fazie de l cerron a modo fol de gaita. Era a la hora de stiáren las canhonas que mais gustaba de sacar aqueilhas dues trabas d’uolmo: miraba-las bien por todos ls lhados, passaba-le la mano nua fiesta i solo apuis s’amponie cula faquita. Nunca an sue bida fazira uas cholas, mas aquel piso staba a quedar ameroso cumo ua primabera: l frisgo tan dreito que nun falhaba un pelo, anque feito sin formon, i l piso yá oubado bastante pa le meter la çuola de canal i, assi, deixar purfeito l ancanalado de l pie. Mas esso habie de ser feito ne l lhugar, que l bezino por nada deste mundo deixaba salir la sue lharega de casa. Ls outros purparatibos yá stában arrecadados ne l queixon que scundira ne l triato: la cinta para arrodiar l frisgo, las ariestas de çoco, dun oubal que relhumbraba, i l bezerro para tapar l pie. L bezerro fui l mais custoso de achar. Baliu-le un guarda de baixo que le trocou uas botas bielhas por ua cordeira. Tirando ua tumbica, que mal se bie, l bezerro staba cumo nuobo framante.
Un die, deixou l tagalho cun Marie i bieno-se al lhugar. Çponie-se l sol quando quando dou las cholas prontas. Puso-las anriba dua talha i mirou-las, bien pintadas, nin ua scadarça, nin ua mancha, las ariestas cumo crabeado de streilhas. Nun fura l rugido, pensou, i naide dirie que nun éran uas botas. Tornou-las a guardar ne l triato i fui-se a tener cul ganado. Agora yá podie treminar l casamento cun Marie.
Quando antrou n’eigreija, l rugido de las cholas até oubrigaba ls santos a mirar. Mas naide antendie que lhembrança fura aqueilha de lhebar l cerron al ombro para se casar. Tamien solo Juan se dou de cuonta daquel jeito nerbioso ne ls beiços de Marie, que el coincie tan bien. I anquanto deixaba de oubir l rugido de las cholas, cumo se bolara, Marie antendiu l que Juan nunca fura capaç de le dezir, an fala. Era mesmo cun aquel pastor que eilha se querie casar.
Fracisco Niebro
