[L jornal O MIRANDEZ, n.º 35, de 10/09/1895, p. 3, publica un nuobo testo assinado “B.F.M.” - Bernardo Fernandes Monteiro. Ye un testo cun pensamientos subre ls uolhos cumo speilho de l’alma de las pessonas, neilhes i por eilhes amostrando Dius todo l sou poder. J. Leite de Vasconcellos dá cuonta deste testo ne ls Estudos de Philologia Mirandesa, I, p. 27, adonde acrecenta que se trata dua traducion. Anque esta andicaçon nun benga ne jornal, nin you fago eideia d’adonde tenerá sido traduzido l testo, nun beio rezones pa la cuntestar. A. F.]
Por Bernardo Fernandes Monteiro
Antre todas las cousas que l Outor Debino criou n’home, niua deilhas ten mais que admirar, cuntemplar, i celebrar, que les uolhos; i assi dezírun muitos outores que les uolhos son la cousa mais preciosa que hai ne cuorpo de l home, i mais principal antre todas las mais partes del; i outros outores dízen que nes uolhos stá l assiento de l’alma; porque les uolhos son les guias de l amor, de l ódio, de l’oudácia, de la bergonha, de l gusto, de les cuidados, de la pena, i de la bingança. Quando son andicador de l amor, se móstran brandos, i afables; i quando se móstran cun ódio, se móstran brabos, farozes, i cun ousadie; i quando se móstran atrebidos, se decláran i móstran que quieren saltar fuora de la cara, i quando se móstran cun rebréncia, stan cumo pesados, i quietos; i quando ténen gusto, i alegrie, parece que se stan rindo, i stan mui alegres; i quando n’ánimo hai tristeza, stan murchos, anfraquecidos, i zleixados; i quando stan cun ira, se móstran arritados; quando ténen furor, parece que árden, stando muito ancendiados; i quando stan cun piadade parece que stan sumidos, i baixos; i quando stan de bingança, parece que stan torcidos, i atormentados; i quando l sujeito ten pena ou cuidados, stan quietos i sin se mobéren.
